許靖韻自認零食控難忍口 買兩層樓感供樓壓力

許靖韻 出席一個開幕活動，咪睇Angela咁Fit，佢其實係一名零食控，Angela話自己對咩零食都感興趣，仲要戰鬥力驚人，幾乎可以食唔停口，所以佢話每次去旅行，佢都好擔心體重會暴升，所以喺放肆飲食嘅同時，佢都話會做返運動。

許靖韻自稱係零食控。
去年Angela入市買咗兩層樓，佢話唔多唔少都有供樓壓力，所以要更加努力工作，佢仲自薦話可以揾佢做樓盤代言人添，其實Angela一直都好努力工作，今年佢就完成咗幾站巡演，佢話嚟緊都計劃緊再去多幾站演出，不過由於場地仲未落實，所以要遲啲先再公布啦，除咗工作之外，感情事方面，Angela就話如果自己真係揾到Mr.Right嘅話，都唔介意公開，佢仲講笑話另一半可以幫佢一齊分擔下供樓壓力添。
由於有供樓壓力，所以許靖韻話要努力工作。