張惠妹台北大巨蛋開跨年騷第一人 最貴票價只多80蚊 歌迷讚佛心

之前一直只聞樓梯響嘅台北大巨蛋演唱會，終於落實有演唱會消息。台灣天后張惠妹率先公佈大巨蛋演唱會相關資訊，將於12月21、22、28、29、31開五場騷，31日場仲刻意安排夜晚21:30先開場，要同歌迷喺大巨蛋一齊迎接2025年，而aMEI亦成為大巨蛋跨年檔期開騷嘅第一人。

天后張惠妹成為首位於台北大巨蛋開跨年騷嘅歌手
一如外界預測，aMEI終於成功進軍台北大巨蛋，佢本人亦好興奮話：「大巨蛋，我終於等到你了！」由於跨年當晚喺大巨蛋陪歌迷度過，aMEI勢必無法出席家鄉部落最重要嘅豐年祭，估唔到屋企人完全唔介意，仲大力支持，令aMEI可以無後顧之憂，全力準備攻蛋。 

aMEI今次開騷票價竟然只係微升80蚊新台幣

為咗迎接首次大巨蛋騷，製作團隊將演唱會規格再升級，投入高達兩億新台幣製作費，打造前所未見嘅巨無霸舞台，甚至大過上海八萬人體育館嘅規模，至於音響部分更加重金禮聘日本團隊操刀，務求帶俾大家一場難忘嘅視聽饗宴。 而aMEI經理人陳鎮川亦表示，aMEI本人將親自監督所有環節，由編排曲目到演唱會周邊商品，全部都唔放過。而aMEI亦自嘲話：「這些年來只要我『難得』回到台北開演唱會，總是『萬眾矚目』，所以我將會非常珍惜在大巨蛋演出的這幾個晚上！」
雖然票價幾乎冇調整，不過製作費用就高達2億新台幣喇

由於係第一位公佈將於大巨蛋開騷嘅歌手。所以aMEI嘅票價亦有指標性意義，可能會成為日後歌手喺大巨蛋開騷嘅參考，今次aMEI大巨蛋騷最貴票價5880蚊(約1438蚊港幣)，相比起兩年前台北小巨蛋最貴票價5800，只係貴咗80蚊，唔少歌迷覺得係佛心價，不過亦有網友質疑，大巨蛋座位比小巨蛋多，票價應該平過小巨蛋先合理。不過無論票價貴或平，相信以大巨蛋吸引力加上天后號召力，應該都係一票難求。