陳貝兒拍第四輯無窮之路 兩個月走訪七國艱辛指數爆燈

由 陳貝兒 主持嘅《無窮之路》系列播出以嚟反應熱烈，最新一輯《無窮之路IV一帶一路》，將會喺10月6號首播。呢日Janis同監製 阮小清 編審 岑應 ，主席許濤 等齊齊現身記者會宣傳。

《無窮之路IV》仲有幾日就會同大家見面
Janis話節目拍到第4輯完全係意料之外，第1輯得到大家喜愛、第2輯繼續受歡迎，到第3輯叫好叫座，Janis話已經覺得好圓滿，而家嚟到第4輯，佢話對於自己同埋製作團隊都覺得好有鼓舞。
Janis話無諗過節目可以拍到第4輯

Janis仲話呢次同製作團隊用咗兩個月時間，走訪7個國家，包括阿聯酋、沙特阿拉伯、希臘、塞爾維亞、埃及、馬達加斯加以及肯尼亞，呢次嘅拍攝經歷亦係咁多輯當中，甚至拍節目以來最艱辛嘅一次。
新一輯節目走訪一帶一路相關嘅7個國家

佢話中東接近50幾度高温，要喺當地拍外景時真係中暑，去到非洲又腸胃炎，而其中一位攝影師喺非洲貧民窟被狗咬，所以Janis指前線工作人員真係勇字當頭，絕對值得表揚。至於會唔會再接再厲開拍第5輯，Janis就話要視乎觀眾反應，如果有值得及有意義嘅題材，相信都唔會放過呢個機會。