中年好聲音3｜決戰新馬今晚繼續上演 韓依納開口如陳潔儀登場

車婉婉 擔任主持， 肥媽 張佳添 周國豐 伍仲衡 同 曾路得 擔任評審嘅《中年好聲音3之決戰新馬》今晚播出第2集。 餘下10位新馬賽區參賽者將會登場，同樣身為駐場歌手嘅 韓依納 同 蕭偉倫 實力不容少覤 。

57歲嘅韓依納獻唱《浪子心聲》，一開口就引起極大迴響，因為佢嘅靚聲同新加坡歌手 陳潔儀 似到十足，伍仲衡話：「你把聲好入咪，我真係以為陳潔儀唱緊。」又大讚韓依納感情真摯：「你唱呢首歌唔係靠唱功，反而呢個仲難，你唱出咗個味道，你喺啲Verse度唱到，好 touching。」張佳添亦都話：「雖然你57歲，但你有把好年輕嘅聲音，你係一個有氣場嘅歌手。」
韓依納嘅演出獲幾位評審大讚

而曾代表過馬來西亞參加三人籃球賽，目前已退役嘅39歲嘅蕭偉倫獻唱《最愛的你》磁性靚聲同樣獲評審大讚，肥媽指：「好多人以為阿倫(譚詠麟) 啲歌好易唱，其實唔係，你把聲磁性好厚，所以你係有着數。」蕭偉倫除咗以靚聲屈機，身高亦搶去唔少風頭，婉婉笑言難得喺舞台上要抬高頭望人。
前大馬籃球選手蕭偉倫嘅身高令婉婉驚嘆

今集仲有姊弟檔：57歲嘅何平秋同50歲嘅何平亮出場，何平秋係會計師，年輕時曾入行成為 歌手6年，後來先轉行；近年重拾歌唱興趣決定參加《中年好聲音》，惟獻唱《是否》嘅佢一開口就出現重大失誤，因過度緊張導致入錯歌，最終能否撥亂反正成功晉級呢？
何平秋可能因為太緊張，曾為歌手嘅佢竟然入錯歌

活動策劃人何平亮獻唱《北風》，他獲評審大讚靚聲，周國豐話：「幾鍾意你個mood，好有 80年代歌手嘅風味。」而張佳添就指：「你個Tone好好聽，一路聽一路好似按摩緊我耳仔咁。」
細佬何平亮嘅唱腔亦獲評審好評

今集仲有新馬賽區最年長參賽者傅開成登場，現年74歲嘅佢係退休攝影師，2015年展開退休生活，重拾唱歌興趣，仲堅持每個星期都會去游水同浮喺海中練歌，認真老而彌堅。新馬賽區最終12強花落誰家，記得留意《中年好聲音3之決戰新馬》。
新馬賽區最年長參加者傅開成，退休前係一位攝影師

退休之後佢一直緊持每星期邊游水邊練歌

《中年好聲音3之決戰新馬》今晚 20:30 翡翠台