中年好聲音3｜雙浚配合壁獲90分奪第一 藍組分數最低無奈淘汰蕭偉倫

星期日晚播映嘅一集《中年好聲音3》，有 劉美君 出任嘉賓評審；而 谷婭溦 韋綺姍 同 謝文雅 分別擔任導師帶領「藍組」嘅劉傳民、蕭偉倫、劉曉昆、 高菲、宗倩如、楊炳德、占士丁丁（Dan James）、羅逸軒、陳溢光、張與辰；「紅組」嘅何平秋、杜閱、侯靜伊、陳嘉琦、郭偉倫、李創偉、阮慧珊、曹 越、劉洋同「綠組」嘅趙浚承、林立峰、陸東成、李金凱、王鄭浚 仁、任永健、善玥澄、尤詩郡、陳芷盈、胡家健。

呢集嘅30強「導師分組賽」，上半場賽事戰況相當激烈，「雙浚配」趙浚承同王鄭浚仁合唱《我不會唱歌》，以90分霸佔第一名，二人所屬嘅綠組亦以244分獲三組中最高分組別；藍組就只得238分成為最低分隊伍，需按照賽制由評審決定淘汰一名隊員，最終蕭偉倫被淘汰。
雙浚配嘅《我不會唱歌》輕鬆獲90分排名第一位

第二次為《中年》擔任導師嘅谷婭溦，面對隊員被淘汰不禁眼濕濕哽咽，流露不捨同不忍之情：「我想講佢真係好努力，每次練習都出盡全力，練到成身濕晒咁滯！但佢從來冇講過『唔得，要放棄』，仲同我講『老師，你講乜我一定做到佢』。」
溦溦對蕭偉倫被淘汰非常可惜

而今集獲第二同第三最高分嘅，就係藍組嘅Dan James、劉曉昆《揮着翅膀的女孩 /Proud of You》(廣東話版本為《我的驕傲》)，以及紅組嘅阮慧珊、侯靜伊《16號愛人》，兩隊分別獲得86分同83分。
劉曉昆同Dan James合唱排第二，可惜分組仍屬最低排名

Dan James同劉曉昆演繹嘅普通話混合英文版《我的驕傲》大獲好評，谷婭溦同周國豐大讚 Dan James努力練習普通話，就連喺茶餐廳食飯時都不忘練習！張佳添大讚佢哋演出極有化學作用，令佢喜出望外：「聽完好warm、好heartfelt(感情真摰)，Dan用氣用聲好實淨，冇壓迫感，不過曉昆嘅高音略為緊咗啲，顯得單薄少少。」
陸東成、任永健合唱《心淡》被指失準

而「綠組」同陸東成合唱《心淡》嘅任永健，尾段時緊張甩beat，表現略為失準， 最終兩人僅得79分；劉美君點名大讚陸東成臨危不亂，淡定表現極佳：「你唱得好好、control得好好，我聽得好舒服。永健嘅和音錯咗你仲繼續hold得到，係要讚嘅。」張佳添則狠批表現大跌watt：「你哋太熟原本隻歌，可能緊張令你唱得急咗，所以成件事個chemistry係一般般，成件事真係跌咗watt。」

三組經上半場比賽之後分數

晉級選手名單
《中年好聲音3》星期日晚 翡翠台