中年好聲音3丨導師分組賽正式展開 劉美君任嘉賓評審傳授心得

《中年好聲音3》喺1月5號晚播出一集，30強學員將會上演導師分組賽，賽事會分兩個禮拜以上下集方式播出，主題就以「千禧年代最受歡迎男女歌手金曲」，由三位導師韋綺姍、谷婭溦同謝文雅親自挑選學員同佈陣出戰，而今次會有大灣區同大馬學員，所以好多時都要遙距指導，其中Rita嘅「紅組」隊員嚟自唔同地區，連性格反差都相當大，Rita就安排大馬學員何平秋夥拍香港學員李創偉出戰，Rita指平秋比較保守，喺肢體互動上好避忌，再加上佢屬於重炮手演繹，要改為溫柔演出會有一定困難。
韋綺姍率領紅組。
帶領「綠組」嘅謝文雅指隊員林立峰喺賽事中接受挑戰，帶出搖滾味道演繹，而率領「藍組」嘅谷婭溦亦為隊員蕭偉倫被人誤解演繹方式而澄清。
谷婭溦率領藍組。
喺之前團戰中拎到最高分一隊，當中兩位隊員趙浚承同王鄭浚仁再次被編入同一隊，仲一齊以雙語版合唱李克勤《我不會唱歌》出戰，雖然事前得三日備戰，但幸好喺團戰時培養到默契，令今次合唱順利。
謝文雅率領綠組。
今集亦邀請劉美君擔任嘉賓評審，佢仲請學員食生煎包緩和緊張氣氛，佢話直至今時今日，佢上台都會有緊張心情，所以學員緊張係在所難免，最重要係事前點學習去克服緊張表情。佢亦覺得節目可以畀中年人重拾夢想，係非常好意念。

今集邀請到劉美君擔任嘉賓評審。