李幸倪飛身救波撞瘀腳 曾傲棐重返母校感受深

李幸倪Gin Lee同 曾傲棐Arvin 嘅學校巡迴運動比賽日前嚟到第二站，呢次佢哋去到Arvin嘅母校同一眾師弟師妹挑機大版羽毛球。

劉若寶Polly、李幸倪Gin Lee 同 曾傲棐Arvin 。

為咗爭取時間先同校長及老師們影相聚舊，Arvin當日專登預早到學校，隨後當眾師弟妹見到佢時亦爭相合照，對此Arvin坦言十分幸福：「我覺得我係幸運嘅，亦都係幸福嘅。我成日都覺得離開咗一個地方、暫別咗一個社群之後俾人記得係一種福份。尤其好多都係喺我成長路上對我嚟講好重要嘅老師。我好珍惜呢份緣份，多謝佢哋令到我有種『哎呀你返嚟啦』嘅感覺。」
佢哋玩巨大版羽毛球。
比賽期間，Gin Lee相當投入，仲一度飛身救波而搞到撞瘀膝頭，事後佢話：「而家行路都仲有啲痛。好開心，見到啲同學仔，可以同佢哋一齊互動，佢哋嘅反應又非常之熱情，所以我就興奮得滯，都提咗自己唔好咁搏命㗎啦。」

Gin Lee對同學使出摸頭殺。

Gin Lee笑住話懷疑Arvin有私心想偏幫母校，喺比賽時「放水」，所以佢只好出力返少少呀。主持劉若寶Polly亦撐 Gin Lee嘅講法，仲話親眼目擊Arvin特登打歪啲：「平時我見佢打波都好勁，啲波基本上佢都接得晒，但係唯獨有幾球無啦啦接唔到，仲要俾啲好驚訝嘅反應，可能真係唔覺意放咗少少水。希望Arvin佢會反省吓啦，哈哈。」

Gin Lee飛撲去救波，搞到撞瘀腳。
面對兩人嘅指控，Arvin話回鄉探親點都要讓少少，但強調自己只係讓咗兩球，只不過自己技不如人加上狀態不佳，先有所失誤呀。對於畢業五年後重返母校做活動，Arvin坦語感受特別深：「今次我自己行上禮堂，可能因為曾經日日都喺到返學放學。就算隔咗五年返嚟個感覺好似琴日先行完咁，人生真係第一次有呢個咁奇妙嘅感覺。好似乜都變咗好多，但係又乜都冇變。」而喺比賽過後，Arvin仲喺校園內兜咗個圈，但因為怕影響到同學上堂，所以只係喺有限度範圍內行一轉，而期間佢仲撞到自己中學嘅同班同學：「有啲係嚟見工，有啲就已經係返番嚟母校做老師，個感覺好奇妙，大家用唔同身份再聚首一堂係有種令人為之動容嘅力量。」
對於重返母校，Arvin話好開心。