梁釗峰拍MV碌爆人情卡 出動80歲大姑媽破格登場

梁釗峰新歌《離合的藝術》MV正式上架，而佢呢次大打親情牌，出動梁家得高望重嘅80歲「大姑媽」粉墨登場喺MV跳舞。釗峰更碌爆人情咭，邀請話劇界神級演員區嘉雯以及高翰文前輩、釗峰合作逾十年的髮型師好友Zanki、同學、造型師同排舞師等好友演出。 呢次以講世間愛情、每段關係悲歡離合、有聚有散為主題，小克嘅詞令釗峰好優雅咁面對離合。

梁釗峰新歌《離合的藝術》MV正式上架，而佢呢次大打親情牌。

今次台前幕後亦有好多識咗好耐，但第一次合作嘅朋友，釗峰就覺得係好好嘅因緣。 釗峰感謝每位MV嘉賓全力以赴，又演戲又跳舞，期間佢更化身小影迷，沉醉喺前輩嘅演技之中，佢話：「重中之重當然係翰文大哥同嘉雯姐嘅『劇力萬鈞』戲份。佢哋飾演一對好耐無見嘅舊情人，心照不宣，雖然無對白，只用眼神，好適合呢首歌。」二人對望眼神千言萬語，慢慢滴淚，全場氣氛凝結，直到導演叫cut，大家先敢唞氣。 

釗峰合作逾十年的髮型師好友Zanki、同學、造型師同排舞師等好友演出。

MV中釗峰有一段獨舞，拍攝前兩天他預先在排舞室苦練，到場後默默在一旁練習，非常認真。佢笑言：「多謝老師悉心教導，我覺得自己十幾分鐘就上手。但跳到又唔代表跳得好睇，學識之後再用畢生嘅時間去跳好，我未跳得好。」單人華爾滋，釗峰有所領悟：「男人最緊要有膊頭，被搭住就要支撐住對方。單人跳舞要靠幻想，練習時我幻想跳舞老師，諗住佢會點樣督促我。至於拍MV時，我梗係幻想過去離離合合嘅對象。希望睇到MV嘅人，聯想到自己同最難忘嘅人，跳返一場舞。」 

出動梁家得高望重嘅80歲「大姑媽」粉墨登場喺MV跳舞。

提到大姑媽時，釗峰就興奮表示：「早前同大姑媽慶祝80歲生日，今日嚟拍MV佢好開心，佢話個個都叫佢大姑媽，個個都係佢侄仔侄女。」為配合MV劇情，釗峰出動私伙錄Demo嘅咪高峰同耳機，現場唱新歌被對坐嘅嘉賓聽，佢話：「今次邀請相熟朋友拍攝，佢哋代表唔同年齡層，我希望坐喺對面聽我唱歌嘅係熟人，同我有聯繫，我可以唔忌諱，好放鬆咁去唱歌，令MV更有靈魂。」

大姑媽拍MV好開心，個個都叫佢大姑媽，個個都係佢侄仔侄女。