與阮經天戲中有多場大膽纏綿戲 林嘉欣放飛自我大談與情慾距離

由曾寶儀監製嘅台灣愛情電影呢日喺香港舉行首映禮，電影演員陣容強大，其中一個單元故事主角林嘉欣、阮經天，亦同曾寶儀一齊現身首映活動，李靖筠、麥玲玲、C君、蘇麗珊及顧定軒等圈中都有到場支持。

阮經天同林嘉欣喺戲中有唔少情慾戲。
小天同嘉欣今次喺戲中情慾戲滿滿，嘉欣唔只唔尷尬，佢仲語出驚人，話因為大家事前溝通得好清楚，所以埋位時大家係盡情去釋放情緒，至於問到有冇勾起佢對戀愛嘅感覺？嘉欣就話自己反而覺得「情慾」對佢嚟講係好耐之前嘅事，旁邊嘅曾寶儀聽到即刻推嘉欣出鏡頭以外，不斷問嘉欣知唔知自己講緊乜，又叫大家將呢段cut咗佢，仲話嘉欣拍完呢部戲已經放飛自我。而當在場傳媒趁機追問小天，覺唔覺得嘉欣放得好開？曾寶儀亦即時攔截，叫小天唔好回答呢啲問題，場面惹笑。

嘉欣完全放飛自我大談自己同情慾嘅距離。嚇到曾寶儀即刻將佢推開。
戲中小天有唔少騷身材戲，曾寶儀就話劇組眾人都對小天嘅身材相當滿意，至於嘉欣就話畀足200分，令曾寶儀笑佢因為身處搖滾區，距離特別近，加上有3D體會，所以畀分會同大家唔同。而小天就話因為拍攝現場嘅氣氛好好，所以都唔使做啲咩準備，一切都係自自然然用角色嘅狀態去面對，又講笑話只要寶儀姐同嘉欣喜歡就好了。
阮經天喺戲中有好多騷身材嘅鏡頭。
為電影碌盡人情卡請嚟超強陣容嘅曾寶儀，話自己只係將一個好嘅故仔交到去畀想拍好戲嘅演員手上，所以大家賣嘅絕對唔係人情，而係呢套戲。而嘉欣則指係李心潔直接搵佢洽談，當時故事都未睇就已經答應演出，因為嘉欣話對心潔嘅信任程度，係直接可以將性命交畀對方。

曾寶儀話自己唔係碌友情卡。