羅力威久違公開演出人氣依然 有意效法古淖文參加中聲比賽

羅力威 同 雨僑 婚後育有一對子女，差唔多近4年喺幕前公開演出，繼早前Busking後，呢日又現身一個活動擔任嘉賓，神隱呢幾年間羅力威主力同太太一齊照顧一對仔女，咁耐無演唱嘅佢都話心情有啲緊張，但見到Fans咁多年嚟對自己依然不離不棄，令佢覺得好感動，更自愧表示都係自己唔好，因為一直都同大家講會再推出新作，但遲遲未兌現承諾，希望過多幾個月可以有新歌推出。   

已經幾年未有公開演出嘅羅力威呢日現身

要全職照顧一對仔女，羅力威笑言仲辛苦過返工，尤其大女係高敏兒童，情緒好易失控，所以羅力威曾經都好崩潰，幸好喺老婆同子女身上學習到耐性，並自認唔係一個好有耐心嘅人，甚至生咗小朋友後先知自己嘅耐性係咁少，最初以為喊十分鐘已經好耐，原來可以喊一個鐘，完全顛覆自己所想。

佢又話要向歌迷抱歉，會盡快推出新作
雖然咁耐無公開演唱，但羅力威對唱歌熱誠仍然不減，早前佢同埋當年星光幫嘅戰友同評判現身Re-U即掀起回憶殺，加上古淖文喺《中年好聲音2》勇奪冠軍寶座，不少人期待羅力威會現身《中年好聲音》舞台，羅力威話保持到現時水準都可以去參加，希望再帶住當年份自信出戰。

羅力威仲話自己非常有信心參與《中聲》比賽呀