溫碧霞洛杉磯洽談動作片 宣布年底舉行倒數演唱會

溫碧霞日前飛到美國洛杉磯，同荷里活電影製作人見面，洽談一齣動作電影拍攝事宜，之後再轉飛西班牙影寫真。此行老公何祖光（Kenny）亦一同隨行，仲同喺美國讀書嘅兒子Xavier(何國倫)會合，順道陪囝囝喺洛杉磯面試新學校。

溫碧霞近日到美國為一部動作電影拍攝同片方洽商
Irene上半年工作繁忙，難得一家三口抽空同遊，喺工餘時佢都爭取時間四出遊玩，Irene心情靚靚話：「如果Xavier考取入讀洛杉磯學校，我哋可能考慮喺洛杉磯買屋，我哋全家都好鍾意呢度天氣，好舒服。」
此行老公何祖光亦有同行，又為囝囝何國倫面試新學校

講到今次拍攝嘅寫真集，Irene好興奮話：「今次拍攝寫真可以順便讓自己努力keep fit一下，希望自己又可以有最好嘅狀態，迎接我內地巡迴演唱會同《謊島美人魚》上映，呢套戲即將喺2025年初新年上映，呢部係令人睇完之後會心微笑嘅電影，希望大家新嘅一年都可以笑口常開，迎接美好未來。」
Irene又話將會去西班牙拍攝新寫真

將於11月喺內地展開巡迴演唱會，Irene近日積極練歌嘅同時，亦宣布好消息，「今年仲會開倒數演唱會，演唱會最大嘅樂趣係可以直接同鍾意我嘅粉絲見面。」

又有計畫年內開演唱會