張繼聰隔空回應老婆愛的宣言 憶初出道面時做歌手失望而回

熱愛運動嘅 張繼聰 呢日出席一個運動腕表活動，講到跑步同運動，無論跑街跑山都難唔到阿聰，而佢做運動呢團火更感染埋阿仔張曕，父子不時會一齊出動長跑，喺囝囝細細個時，阿聰就會限制兒子打機時間，後來就以跑步里數換打機時間，佢認為呢個係唔錯機制，而且跑步又可以同阿仔建立良好親子關係。

張繼聰將熱愛運動嘅基因傳埋俾囝囝
除咗阿仔之外，阿聰都會鞭策太太謝安琪Kay做運動，佢唔單止成為阿Kay嘅魔鬼教練，更係老婆人生最好嘅伴侶，阿Kay早前公開愛的宣言，話阿聰係佢出道20年最大得著，阿聰話好感動太太終於講出真相，證明佢呢個老公起碼都合格，的而且確阿Kay就係阿聰入行認識嘅第一個朋友，回想同阿Kay嘅開始真係緣份，因為阿聰當時去到一間唱片公司面試，因為高層遲到而錯過約見機會，令阿聰要到下一年才出道做歌手，佢話：「當時面試唔成好失望，但後來覺得整定係天意，可能係我啲仔女搭時光機令高層遲咗出門口，若果早一年做歌手，我就未必識到老婆，同行做兩夫妻已經難，何況我哋可以互相扶持欣賞，係人生最好伴侶。」

佢仲指陰差陽錯遲一年出道，令佢遇上太太謝安琪非常感恩