羅啟豪busking走入校園 以歌聲鼓勵學生勇敢追夢

《中年好聲音》歌手羅啟豪busking走入校園，呢日佢現身一間小學，以歌聲與莘莘學子交流，羅啟豪依然好受歡迎，雖然佢唱啲歌，小學生未必首首聽過，不過同學們都聽得好投入。

羅啟豪日前到一間小學為同學獻唱同分享
呢次係羅啟豪歌迷會發起Busking Tour其中一站，之後佢都想喺中學、大學同樣做一啲分享同唱歌，羅啟豪之前十幾年冇喺香港住，好多地方未去過，希望透過Busking Tour去香港唔同嘅地方。
又同一班同學仔一齊合唱

羅啟豪獻唱多首正能量歌曲，仲喺台上分享個人經歷，想鼓勵一班學生勇敢追夢，羅啟豪坦言講嘢嗰陣仲係好緊張，當佢唱到《相信相信》，一班小學生出現同佢一齊合唱，令羅啟豪覺得好驚喜。

Ramon話希望同學都要為自己勇敢追夢