與家人聚餐慶祝農曆生日 羅家英願望：家庭幸福唔好嗌交

羅家英、謝雪心同黎燕珊出席中國文化藝術傳承協會就職典禮，家英哥會擔任顧問一職，繼續推廣粵劇發展，稍後佢仲會去到泰國進行粵劇交流，雖然咁忙，佢都冇忘記要為太太汪明荃下月個唱打氣，佢仲話朝朝都叫阿姐早啲起身跑步行山練氣，不過時間太早佢就唔會陪跑。

羅家英

日前係家英哥農曆生日，佢話自己重視農曆生日多啲，當日相約家人一齊食飯簡簡單單慶祝，而生日願望係身體健康、做多啲好作品畀觀眾欣賞同埋家庭幸福唔好嗌交。
黎燕珊
珊姐近日榮升為新手婆婆，雖然湊孫女好辛苦，但係只要見到孫女麥芽糖就心甜，佢話孫女滿月時候，自己打咗條好重嘅金鏈，再鈎上囡囡三十年前出世時掛嘅玉墜，佢仲話孫女係萬千寵愛在一身。
謝雪心
心姐嚟緊有皇牌劇集系列推出，忙於宣傳新劇之外，心姐亦出心出力為紀念師傅任劍輝離世35周年嘅騷綵排，今次演出收益將會以任姐名義捐畀博愛醫院，心姐仲預告會獻唱多首師傅名曲。