張智霖袁詠儀素顏赴日過白色聖誕 18歲阿仔獲讚完美遺傳高顏值基因

張智霖 （Chilam）同袁詠儀（靚靚）一向錫到阿仔燶，18歲張慕童（魔童）遺傳父母良好基因，又高大又靚仔，Chilam早前笑指鼓勵阿仔快啲拍拖，最好下年結婚生仔，等佢有得湊孫，靚靚噚日喺社交平台貼出一家三口合照，一家人出發去日本過白色聖誕。

張智霖同老婆靚靚一向錫到阿仔燶。
相中見Chilam同靚靚素顏示人，可見二人皮膚不俗，雙眼依然炯炯有神，確係保養得宜，而身穿綠色外套嘅魔童，越大越靚仔，唔少網民見到魔童嘅顏值，大讚魔童對眉同眼好似媽咪，更有網民讚魔童造型有啲似金城武。

靚靚噚日喺社交平台貼出一家三口合照，一家人出發去日本過白色聖誕。
Chilam同靚靚向來同阿仔咩都有商有量，靚靚亦好珍惜今次去日本嘅滑雪之旅，事關呢次日本行係阿仔魔童主動提出，講明下年開始就要同朋友一齊過聖誕，撇甩靚靚同Chilam，咁佢兩公婆又咁開通，當然好珍惜呢個難得嘅親子時光。

阿仔魔童越大越靚仔！