謝安琪明年陪兒子海外升學 望申請紅館檔期賀入行廿周年

謝安琪 一身全白露肩晚裝現身出席一個開幕活動，唔止高雅又有仙氣，Kay仲獻唱佢嘅首本名曲《囍帖街》，提早向現在歌迷送佳節祝福，佢仲落台同大家互動，十足十小型音樂會一樣。

謝安琪呢日擔任開幕後賓，獻唱時儼如小型音樂會
Kay嘅大仔 張瞻 話咁快經已17歲，仲計劃明年去澳洲升學，所以Kay話會趁住呢個聖誕陪仔仔好好過節，一家人團聚。Kay聖誕節同媽媽慶祝完生日後，就會一家出發去旅行，知道仔仔聖誕節後要瘋狂準備考試，希望趁住假期俾仔仔好好放鬆。
Kay呢日預告大仔張瞻明年將到海外升學，到時會請假陪佢適應

作為廿四孝媽咪嘅Kay又話一定會陪仔仔去海外適應留學環境，已準備請幾個月假陪同開學，但會識得保持適當距離，會喺學校附近租地方住遠距離觀察，唔會24小時𥄫實。佢話因為擔心仔仔到新環境會面對未知嘅問題，相信頭幾個月係關鍵時刻，希望留喺身邊幫忙適應。
明年出道廿周年嘅佢，仲已經努力申請紅館檔期開紀念騷

明年係Kay出道20周年，佢亦好希望可以成功舉行紅館演唱會，兩年前開始經已不斷入紙申請檔期，理想喺下年8至10月開騷，因為既有充足時間準備，開騷計劃又唔撞陪仔仔嘅開學大計。