獨家丨姜皓文也門拍攝《與天地對話》 遇以軍投射導彈大規模空襲

姜皓文(黑哥)日前跟隨TVB節目《與天地對話》攝製隊一齊出發去也門，喺拍攝期間，以軍向也門西部發動大規模空襲。曾一度失聯嘅黑哥喺網上報平安，同攝製隊喺安全情況下完成拍攝工作再啟程返港。

姜皓文呢日隨TVB出發到也門拍攝節目《與天地對話》。

黑哥喺出發前曾經擔心當地局勢同安全，但一直覺得好難得有呢個機會，故並未有卻步，反而家人就有勸告佢唔好去，不過最後黑哥認為TVB攝製隊一定能確保到行程安全，還是跟隨出發。

姜皓文出發時都有表示擔心當地局勢。

收到節目組嘅邀請時，黑哥雖然充滿期待，但原來機程對佢嚟講先係最大挑戰，因為佢哋先由香港飛往多哈，再飛到沙特阿拉伯，逗留一晚後再飛也門，真係聽見都好轉接，佢話平日四個鐘頭機對佢來講都好極限，間中要飛美加地方工作都令佢好頭痕，幸好今次獲得攝製隊體諒，安排盡量短時間機程，以安撫佢不安情緒。而今次也門之行雖然來去匆匆，黑哥除咗介紹當地風土人情外，最期待嘅環節就話係同自己對話。

姜皓文喺也門遇到以軍空襲。