中年好聲音3｜大灣區新馬選手PK戰開始 24選手決鬥爭入圍15席位

《中年好聲音3》來自大灣區同新馬區嘅參加者激鬥一輪後，分別有12名選手成功晉級，今集起佢哋嘅PK戰亦正式展開。24位參賽者中只有15位能夠晉級，佢哋將以抽籤形式一對一決戰，落敗者會先跌入「待定晉級區」，而餘下3個名額就會由評審選出。

今集對戰陣容如下：

王鄭浚仁《明日話今天》VS 陳欣《不後悔》

劉傳民《我應該》VS 敖綺珊《誰來愛我》

莫健發《難以捉摸你的心》VS 張輝《愛要怎麼說出口》

蕭偉倫《你要的愛》VS 吳帆《你的名字我的姓氏》

韓依納《命運我操縱》VS 趙慧瑩《我們的主題曲》

張淑鳳《再度孤獨》VS 姬麗婷《至少還有你》

首對出場嘅PK組合係新馬區5燈選手王鄭浚仁以《明日話今天》，對戰大灣區3燈選手陳欣嘅《不後悔》，相比起首集獻唱《同花順》獲得5燈滿分亮眼成績直接晉級，王鄭浚仁今次似乎跌Watt陷入危機，獻唱期間王鄭浚仁嘅華而不實歌唱技巧，聽到一眾評審皺晒眉，肥媽仲狠批：「你喺度表現你個技巧，我唔覺得你唱緊隻歌。」而伍仲衡仲直指佢揀錯歌：「一個好嘅 Producer會教你首歌點唱，你頭先太Hyper，首歌唔係上山下海！」
王鄭浚仁呢集演出慘被批賣弄技巧

今集亦有唔少熱血同洋蔥發放，曾代表馬來西亞打三人籃球賽；新馬區4燈選手蕭偉倫(Alan)，自從腳傷四次開刀接受手術後，就退役轉型為全職模特兒，其後仲加入樂隊擔任主唱，歌唱生涯更曾遭友人質疑「仲可以唱幾耐」，佢亦直言自己冇答案：「趁而家仲唱得就盡努力去唱，我想同自己講，呢10年嚟冇行錯路，堅持係啱。」
曾係籃球運動員嘅蕭偉倫因傷轉換跑道

獻唱《你要的愛》嘅Alan獲曾路得大讚：「我覺得真係好男人、好 Man！」周國豐則話：「你可以做到男性版本，而我唔覺得核突，你今日係一個好好嘅開始，證明畀你班豬朋狗友睇，你係識唱歌！」
呢日佢嘅表現就獲評審大讚

而首對「女女PK」組合，就由大灣區3燈選手趙慧瑩同新馬區4燈選手韓依納對壘，趙慧瑩獻唱嘅《我們的主題曲》被批歌曲簡單，期望佢演出更有力量同層次；而坦言冇諗過首輪能順利晉級嘅佢，就認為自己首要條件係建立自信：「我由細到大係一隻醜小鴨，嚟到呢個舞台已經好感恩。」仲獲全場掌聲，不過肥媽則完全唔同意佢嘅睇法：「想問你邊忽醜呢？我肥又肥過 你，老又老過你，我都咁有信心，依家仲等緊仔溝我架，我唔要咋！」趙慧瑩聞言感觸落淚。
極欠自信嘅趙慧瑩自稱醜小鴨，獲肥媽大力鼓勵

而人生首次唱快歌嘅韓依納，獻唱《命運我操縱》就得到評審們南轅北轍嘅評價，到底邊啲選手可以成功晉級？記得密切留意今晚《中年好聲音3之大灣區新馬PK戰》。

《中年好聲音3之大灣區新馬PK戰》今晚 20:30 翡翠台