小菲象包場辦MV劇場版首映會 Chantel視像參與見周嘉洛感驚喜

喺新西蘭準備緊公開試嘅 姚焯菲 ，呢日又以視像形式同小菲象見面，事關一班歌迷為Chantel喺戲院舉行新歌《至少他不似你》MV劇場版嘅首映會，Chantel話自己都未試過有首歌，會有MV劇場版，所以係一個好特別嘅體驗，亦勾起佢拍呢首歌MV時嘅點滴。

Chantel嘅歌迷為《至少他不似你》劇場版舉辦首映會
雖然因為年紀尚細未曾有過MV中嘅愛情經歷，但Chantel話只要代入其中，就一樣會有傷感嘅感覺。至於要挑戰喊戲，Chantel就認為唔算太難，自己一直努力蘊釀情緒，諗住心裡面嘅矛盾以及代入女主角嘅情緒，咁就自然喊出嚟喇。
喺新西蘭返學嘅佢以視像形式參與

周嘉洛就以嘉賓身份「出現」

而喺首映會上，仲有一位特別嘉賓，佢就係同樣透過視像現身嘅 周嘉洛 喇，Chantel話自己雖然人在新西蘭，但係佢就成日會追睇《愛·回家》，除咗喺忠粉之外， Chantel 亦好想聽下自己唱嘅主題曲，喜洛問Chantel如果客串一角，想做咩角色？Chantel就自薦話想做表妹，至於可唔可以成事，就要睇公司安排啦！呢個首映會可以順利舉行，當然要歸功一班小菲象啦，佢哋仲隔空向Chantel送上祝福呀！

Chantel仲重提話有機會好想參演《愛．回家》