朴信惠新劇演正義惡女壓力大 丁海寅新片首映獲緋聞女友庭沼玟撐場

韓國女神朴信惠喺新劇一改甜美形象飾演惡女角色，觀眾亦相當受落，一開播收視狂升，早前佢同金宰永、金吝勸、金雅永等出席新劇記招。朴信惠相隔8年再次同SBS電視台合作，佢話出道至今同平台合作嘅作品成績都相當唔錯，多部劇都深入民心，不過對於大家嘅期望佢就話好大壓力喇。

朴信惠嘅新作大受外界歡迎
今次喺劇中變身成為正義惡女，題材又新鮮，所以拍攝時都相當開心，佢仲讚拍檔金宰永係劇組嘅開心果，無論係對同劇演員定工作人員，都可以不厭倦咁一直發放能量，自己都自然咁被對方感染到，亦漸漸被同化，變得更加合拍呀。
佢仲話金宰永係大家嘅開心果

韓國元祖級男神張東健，相隔6年重返大銀幕，呢次聯同薛景求、金喜愛及秀賢演出新戲，戲中張東健同薛景求飾演兩兄弟，為仔女而發生磨擦，繼而發生連串事件。喺記者會上張東健話同薛景求認識多年，二人首次合作拍戲就學到好多嘢。佢又指戲中一幕於天台鬧交戲，本身自己準備咗好激烈嘅演繹方式，但係薛景求就好慢好輕鬆咁接戲，加上拍攝時同綵排嘅唔一樣，對方有好多即興演出，令場面更加真實。
張東健相隔多年後終於再重現大銀幕

影帝薛景求向來畀人沉穩嘅印象，戲路多數都係較沉重，呢次故事懸疑得嚟又有親情同搞笑，佢話自己印象最深刻嘅係一場食飯戲，大家嘅演繹令全場爆笑，但自己就一頭冒水，到而家都唔理解大家笑咩呀。

秀賢因為參演荷李活超級英雄電影而為大家熟悉，呢次亦係佢宣布同企業家老公結束5年婚姻後首度現身，雖然佢未有回應私人事，但就喺記者會上同大家分享拍攝時嘅開心回憶。
丁海寅新片宣傳竟獲緋聞女友庭沼玟現身捧場

丁海寅夥拍黃晸玟合演警匪動作片，日前喺韓國舉行VIP首映場，一眾演員齊齊出席造勢，呢個系列相當受韓國戲迷歡迎，現場氣氛相當高漲。除咗戲中演員外，仲有唔少圈中好友嚟到撐場，而最受曯目嘅，一定係最近同丁海寅合作新劇而傳出緋聞嘅庭沼玟不避嫌咁嚟撐對方。