台灣藝人汪建民驚傳癌逝 與曾寶儀媽媽姊弟戀轟動一時

台灣藝人汪建民驚傳因肺腺癌離世，終年56歲。汪建民嘅胞妹透過社交媒體證實哥哥死訊，汪妹寫到：「建民哥於10/7 晚間離開了我們，很謝謝最後這段時間幫忙的朋友們，包含所有細心照顧的醫療人員、社工朋友。謝謝一直以來支持建民哥的朋友們！也對所有被建民哥虧欠的朋友們，致上最深最深的歉意，這輩子虧欠的讓他下輩子還給各位，也懇求各位高抬貴手，給家人們一個空間，隨著建民哥的離世，一切煙消雲散！」

台灣藝人汪建民驚傳因肺腺癌離世，終年56歲。
汪建民早年因為出演本土劇《台灣靈異事件》走紅，劇中佢飾演剛正不阿嘅刑警「鐵頭」，不過螢幕上形象正直嘅刑警，近年因為賭博積欠大筆債務，加上母親罹患失智症需要大筆醫藥費，只能靠直播帶貨維生。今年7月汪建民證實患上肺腺癌四期，確診時癌細胞已經擴散至頸椎、腦內，短短唔夠三個月就宣告不治。

汪建民嘅胞妹透過社交媒體證實哥哥死訊。
汪建民生前冇結婚，據悉近年佢身邊有親密女友Joan，汪建民胞妹文中亦提到多謝哥哥女友Joan不離不棄嘅陪伴，並感謝對方對好多事情嘅承擔。

汪建民最為人熟知嘅一段戀情就係曾戀上大佢12年嘅寶媽王美華。
而汪建民最為人熟知嘅一段戀情就係戀上大佢12年嘅寶媽王美華，當年汪建民因為工作關係同寶媽熟識，進而主動追求，雖然二人相差12歲一度令寶媽卻步，不過係女兒曾寶儀嘅鼓勵下，寶媽先接受對方，二人熱戀時期經常大方放閃，不過呢段感情淨係持續兩年半，據知因為汪建民嗜賭，積欠過千萬台幣賭債，周圍搵人借錢，包括搵寶媽身邊朋友借錢，導致胞媽心死斬情絲，事後談到同汪建民嘅一段情，寶媽仲自爆因分手而爆喊。七月份汪建民傳出罹癌消息，有記者訪問寶媽，佢就坦言二人分手後冇再聯絡，但因為自己曾經同病魔搏鬥，所以希望大家為汪建民加油打氣。