陳友將老婆真實故事搬上台 黎瑞恩首度做音樂劇女主角

陳友、黎瑞恩、張武孝日前齊齊現身音樂舞台劇記招，劇目故事改編自陳友同太太嘅真實故事，以友嫂患病為題材，並由小恩子演出友嫂一角。
張武孝、陳友、黎瑞恩。
陳友分享邀請小恩子做女主角原因，大讚小恩子好有內涵同經歷，亦非常堅強堅毅，同真友嫂一樣「好等得」。雖然第一次同小恩子合作，但陳友就覺得火花十足，加上記招當日二人第一次試踩台表演，即場Jam歌，令佢覺得同小恩子距離又更進一步。
 陳友邀請咗小恩子飾演女主角。
雖然同陳友一拍即合，但小恩子就話，最初受邀演出時係有諗過婉拒，只係出於禮貌赴約同前輩見面。不過當小恩子睇完劇本之後，就深深被故事打動，更感動到落淚。小恩子亦表示故事映射出大部分婦女影子，所以最後佢決定演出。
 陳友話呢個音樂劇係真實故事改編。
劇本埋藏唔少洋蔥伏線，其中一段就包括友嫂帶住囝囝喺美國生活時，囝囝受到欺凌，而友嫂就講：「爸爸係Super man。」鼓勵囝囝要勇敢面對。但當陳友到美國探望母子，阿仔見到爸爸完全唔似超人而大失所望。除咗故事情節，當中嘅歌曲亦會令好多「太空人家庭」深受共鳴。