黃智雯籌備網上真人騷 劉佩玥為鑽研角色閉關

黃智雯（Mandy） 同 劉佩玥（Moon） 呢日以大使身份出席一個義賣活動，為活動籌款之外，亦希望大家多多關注貧窮地區女孩受虐或人口販賣嘅情況。
黃智雯同劉佩玥呢日出席義賣活動。
黃智雯同劉佩玥呢日出席義賣活動。

Mandy早前更跟住機構去到尼泊爾了解當地人口販賣嘅情況，唔少體驗佢都覺得好震撼，Mandy指喺當地同曾經經歷過呢啲事嘅小朋友傾偈後，印象相當深刻，佢又指自己曾經代入對方，如果呢啲經歷發生喺自己身上，會係一個永不磨滅嘅傷疤，喺心理陰影下點去面對自己將來嘅人生同生活。
黃智雯早前到尼泊爾探訪。
Moon雖然冇親身到當地探訪，但佢話聽完大家嘅分享就已經覺得相當震撼，Moon指聽完大家分享後，就諗自己到底可以做啲咩去幫助，佢又指唔好以為自己個人嘅力量好微小，但如果人傳人嘅話都會凝聚成一股好大嘅力量。

黃智雯正籌備網上真人騷。

完成探訪之旅後，Mandy即身體力行成為其中一個探訪女孩嘅助養人，而佢而家又自發籌備緊一個關於「勇氣」嘅網上真人騷節目，希望幫對方圓夢或者彌補遺憾。Mandy話而家收集返嚟嘅故事，好多都係家中經歷巨變、自己情緒上嘅問題而搵唔到出口，又或者係有夢想但實現路到等。
泉叔用手指比劃阿Moon喺《巨塔之后》嘅劇本厚度。阿Moon早前為咗角色而閉關。
Moon自接拍劇集《巨塔之后》後，就有一段時間冇出現喺社交平台，直至最近先post返最近去布拉格取景嘅靚相，原來Moon係為咗個角色而閉關，因為佢話個角色對佢嚟講都唔係咁易處理，亦希望憑呢個角色會畀觀眾見到唔一樣嘅自己呀。