馬國明孖湯洛雯遊濟州島大曬愛情魔力網民讚越嚟越有夫妻相

馬國明日前被網民捕獲與老婆湯洛雯（靚湯）一家人飛韓國旅行，先喺押鷗亭及明洞行街食嘢，跟住馬明同靚湯一行人就去咗濟州島觀光，今日見靚湯喺IG放閃曬兩公婆恩愛合照，唔少網民都讚二人越嚟越有夫妻相，配埋濟州島美景，隔住個mon都感受到馬生馬太好sweet！

馬國明太太湯洛雯今日喺IG放閃曬兩公婆恩愛合照，唔少網民都讚二人越嚟越有夫妻相。
唔知係咪馬國明操刀為愛妻影嘅「老公視角」呢！？

馬明一向畀人感覺係天然呆，受愛情魔力影響之下，婚後變成「寵妻高手」，唔使開工嗰陣願意陪靚湯四圍去旅行，呢次濟州島之行，剛好係韓國花季，馬明陪愛妻睇「粉紅黛子草」Pink Muhly Grass，又去Saebyeol Friends zoo睇可愛嘅黑鼻羊。

馬明一向畀人感覺係天然呆，受愛情魔力影響之下，婚後變成「寵妻高手」。

一向超有愛心嘅靚湯見到可愛嘅黑鼻羊，開心舉起V字手勢。
相中見長髮飄逸嘅靚湯，同馬明喺一片粉紅海影相時，甜蜜送上香吻，少女味十足，果然係被馬明寵上天，而每張合照都見馬明陪伴愛妻時一臉陶醉，毫無倦意，幸福滿瀉。
跟住馬明同靚湯又去濟州島爆紅咖啡店打卡點，連韓綜《換乘戀愛3》都有去呢度取景，呢間咖啡店入夜後有紅燈照喺岩石上，而晚上職員會喺指定時間點上火，營造喺火山嘅景象，馬生同馬太影合照時甜蜜依偎，真係浪漫到不得了！