熊貓福寶飼養員姜爺爺來港 紀錄片見面會分享照顧趣事

熊貓近來成為成中熱話，除咗因為中央政府再向香港送贈一對大熊貓安安同可可﹐更因為盈盈同樂樂呢對移居香港多年嘅老夫老妻，8月中誕下一對龍鳳胎，唔少人都對呢對BB Panda非常關注。

一對熊貓姊弟正於海洋公園健康長大中
因為個性慵懶又揀飲擇食，有人就戲稱熊貓呢種一度瀕危嘅物種係活化石，當然另一方面亦有人奉獻所有去照顧佢哋，等更多人可以了解可愛又罕有嘅物種喇。
好似早喺1994年已經接觸大熊貓嘅韓國愛寶樂園大熊貓飼養員 姜哲遠 ，近年因為網絡興起，加上韓國民眾對一對於當地出世嘅熊貓「福寶」，與及佢嘅父母「愛寶」(華妮)同 「樂寶」(園欣)非常愛戴，而令一見到熊貓就慈祥又有耐心；55歲嘅「姜爺爺」同佢好拍擋 宋永寬 「宋爺爺」都成為網民嘅追蹤對象。
姜哲遠同宋永寬照顧熊貓可以話無微不至

因為熊貓同兩位爺爺都極受當地民眾歡迎，有心人就決定將福寶嘅回歸前過程拍攝成紀錄片《再．見熊貓福寶》，詳細紀錄當中人同動物之間誇物種嘅細膩感情。而姜爺爺今日更會由台北宣傳後飛到香港，出席今、明兩日嘅見面會，同大家一齊分享照顧熊貓嘅甜酸苦辣。
被網民稱為姜爺爺嗁姜哲遠來港出席紀錄片見面會

自2020年一對熊貓於韓國誕生之後，姜宋拍擋就一直負責佢哋起居，照顧唔止無微不至，大家仲可以感受到佢哋同一對熊貓之間嘅深厚感情，可惜今年4月熊貓送返內地，兩位出色嘅飼養員無奈要同子女分開，熊貓離開園區時男子漢宋爺爺輕撫貨車落淚不捨一幕，就充滿洋蔥，現場直播畫面下亦可以感受到佢嘅離愁別緒。
當日宋爺爺不捨輕撫貨車離開，令唔少人都一樣感傷

而姜爺爺當時更正經歷喪母之痛，其母於熊貓離韓前數日不幸病逝，不過姜爺爺仍強忍悲痛，決定繼續護送熊貓返回四川，令人對佢嘅專業態度更為尊敬。

姜爺爺當日送福寶返四川時，其實正經歷喪母之痛