41歲棒棒堂成員敖犬向女友求婚準新娘秒said YES被親友笑太心急

41歲台灣男團「Lollipop棒棒堂」成員敖犬（莊濠全）向細10歲嘅女友發發（FaFa）求婚，二人拍拖一直愛得甜蜜，敖犬同女友交往兩年，早已築愛巢同居，更喺節目《小姐不熙娣》求過一次婚，敖犬日前正式再向女友發求婚，今日二人喺IG大曬求婚戒指嘅相，FaFa呢位準新娘更首次同大家分享當日喜悅，指自己從小就嚮往當賢妻良母，有個幸福美滿嘅家庭。

41歲台灣男團「Lollipop棒棒堂」成員敖犬向31歲女友發發求婚。
敖犬喺節目《模範棒棒堂》出道，佢於2022年大方認愛前空姐女友FaFa，敖犬日前求婚準備迎娶女方，FaFa見到敖犬下跪一刻，已毫不猶豫咁講「我願意」，被親友笑佢太心急、答應得太快，連音樂都嚟唔切播，FaFa笑言差在自己冇搶住戴戒指。

FaFa笑言自己太快答應，差在未搶住戴戒指。
FaFa指跟敖犬一齊嘅日子被「幸福」兩個字包圍，自己亦從細嚮往當賢妻良母，好想擁有一個幸福美滿嘅家庭，「說出來不怕大家笑，但這個就是我的夢想❤️」，佢好感謝敖犬策劃呢個溫馨又感人嘅求婚驚喜，FaFa續道：「比起愛你更想說的是謝謝你，謝謝你讓我擁有了這世界上最好的另一半，謝謝你堅定不移的愛我、寵我、保護我，謝謝你讓我成為最好版本的自己，也謝謝你許我一個家🏠，我們永遠在一起，一直幸福下去吧💖。」一對準新人亦獲得唔少網民留言送上祝福，出post三粒鐘已有2.9萬like！