商場辦音樂節邀新世代歌手參與 Aska自彈自唱憶過世嫲嫲落淚

多位 Gen Z 歌手應邀到參加一個商場嘅音樂活動， 詹天文 張馳豪 同 周卓盈 黃筠兒  趙展彤 陳昭煊 OneUp 林芊瑩 仲有 㛓僑 等分別獻唱，加上舞團演出，現場非常熱鬧。

近日推出新歌《宇宙逃生口》嘅Aska彈奏電結他演唱新歌，更特別為演出練足一星期：「知道接到呢個騷時， 馬上不停練，練足一星期，彈到起水泡，見到反應咁好，覺得好值得。」
Aska呢日自彈自唱新歌《宇宙逃生口》

之後佢再演唱孫燕姿嘅經典《天黑黑》，演唱前Aska話：「呢首歌我細個時好鍾意、好鍾意，因為我同嫲嫲關係好親密，由細湊到我長大，再聽返有種特別感觸，希望今日嘗試感動到大家。」演唱完後Aska返到後台終於情緒失控淚水奪框而出，稍作冷靜之後先話：「今日有好大感觸，有啲失控。嫲嫲葬喺上海，因為重陽節要開工， 提早飛咗上海拜咗嫲嫲。」

之後演唱《天黑黑》時又諗起已離世嘅嫲嫲

 Windy亦先後演唱《風的形狀》同《麻煩彈開》兩首歌，現場反應非常熱烈，之後佢仲猛話好玩：「讀中一、二時，曾經同同學去海邊Busking，不過只玩過一次，剛才演唱回憶返晒嚟。」
Windy呢日亦有返港參與活動

佢又話時下好多年青人都非常內向，鼓勵大家多出外接觸唔同事物，又讚場地為年青人 提供安全Busking嘅地方：「呢度有保安仲有蓋遮擋，落雨都可以照玩。頭先見到有朋友跳K Pop，我都爭啲忍唔住想跳埋一份。」