吳若希與老公賀結婚周年紀念 Alex提七年之癢網民勁食花生

吳若希（Jinny）喺2017年嫁圈外老公何兆鴻（Alex），兩人婚後育有一子一女，不時喺朋友圈孖公仔現身曬愛，近年兩公婆感情就遇上考驗，性格坦率嘅Jinny早前喺網上出po公審老公，大爆Alex積極載女同事返工，又叫佢最好唔好俾人影到，字裡行間明示老公有異樣，引起出軌嫌疑，幸好事件好快平息。

10月10日係Jinny同Alex結婚七周年紀念日。
10月10日係兩夫妻結婚七周年紀念日，Jinny同Alex同步出po紀念，Jinny上載全家幅留言：「唔知幾多周年快樂，何生提醒咗我，原來今日係結婚周年，聽日重陽假期，批准你明天可以瞓遲啲先陪對仔女。」聽起嚟好有女王式命令，而Alex則上載咗有一束彩藍色鮮花及家庭照：「七年之癢，悦妻如初，求生慾望，易如反掌。知足常樂 jinnyng 結婚周年快樂。」反映咗佢對婚姻生活嘅感悟。

吳若希喺2017年嫁圈外老公何兆鴻，兩人婚後育有一子一女。
不過識睇就一定睇網民留言，因為Alex出po後好多網民都食花生，有人話「何生～醒定啲呀！唔好成日激嬲Jinny結婚周年快樂」、「生生性性，唔好再車女同事啦」、「最緊要叫女同事自己搭車呀。」完全勾起昔日老婆開火畫面。

吳若希專登幫老公買咗架新七人車，等老公可以車幾多個女同事都得。
不過相信Jinny唔介意舊事重提，因為日前佢應邀上張馳豪（Aska）嘅飲食頻道下廚時，講返老公好鍾意車女同事返工，而老公係要支持，所以佢專登幫老公買咗架新七人車，等佢可以車幾多個女同事都得。又大讚此舉係「絕世好老婆」，希望大家一齊讚吓Alex，為咗激嬲老婆堅持車女同事。雖然話中有骨，但見Jinny全程鬆容表態，睇嚟暗湧已經告一段落。