姚焯菲獲小菲象補祝生日 爸爸大爆Chantel生活小秘密

姚焯菲 喺新西蘭完成中學課程後返港，9月生日嘅佢因為當時身處外地，所以一班小菲象就為佢補祝生日。一班聲夢好友 鍾柔美  張馳豪 同 林智樂 都一齊現身生日派對唱歌。Chantel覺得今年嘅生日會多咗一重意義，就係慶祝自己中學畢業，而生日願望就係開開心心、身體健康同舉行個人音樂會，兼且去多啲旅行。佢又話今次返港可以逗留9個月，透露經已籌備推出新歌嘅計劃，又會帶嚟新嘅風格，希望到時大家都會鍾意。

Chantel日前已經正式返港，呢日仲同一眾歌迷見面

小菲象仲為Chantel安排補祝生日Party

父母呢日都有出席活動，仲爆Chantel嘅小秘密
Chantel嘅爸爸見到小菲象咁疼錫自己愛囡，於是上台大派福利，即場大爆Chantel鮮為人知嘅小秘密，包括佢鍾意食乜同有潔癖，但Chantel嘅潔癖原來係要求人唔係對自己。
Yumi、Aska同Felix呢日都有現身同Chantel見面

而Felix登上《聲生不息‧大灣區季》嘅舞台後，人氣急升，仲突然被封「可愛男生」，日前綵排嘅時候，仲獲偶像容祖兒送上驚喜，突然上台為佢打氣，Felix反應都嚟唔切。講到被封「可愛男生」，佢笑言咁大個仔都未被人用「可愛」嚟形容，不過佢都欣然接受，仲講笑話若果大家睇到演出片段時，覺得唔夠可愛，千祈唔好喺留言區鬧佢。

Felix參加新一季《聲生不息》，獲偶像祖兒打氣令佢受寵若驚