電影泉攻略｜何超蓮怕同親友睇戲尷尬 喬裝入戲院吸納影迷真實意見丨EP134

今個星期由王鎮泉主持嘅《電影泉攻略》邀請到首度正式進軍大銀幕嘅何超蓮，現身影人Talk講解新戲角色，超蓮會出演一位澳門土生土長女仔，繼承父業做牛雜妹，同此沙發展愛情故事，片中令人勾起90年代回憶。
何超蓮接受《電影泉攻略》訪問。
超蓮受訪時仲未入戲院欣賞自己嘅演出，但佢覺得自己同大班親友睇戲一定會好尷尬，所以諗到個又殘忍又直接嘅好新方法，就係等觀眾入晒場之後，超蓮會喬裝自己包到好似隻糉一樣入場睇戲，聽取影迷最真實意見，期侍大家會鍾意佢嘅演出。
超蓮話同親友一齊睇自己嘅演出會好尷尬。
本周電影新片速遞有《獅子王：木法沙》迪士尼殿堂級經典《獅子王》30週年，全新一集《獅子王：木法沙》由金像級班底打造震撼大銀幕盛宴，講述孤兒幼獅木法沙流落異鄉，徬徨迷失，直到遇上獅王後裔塔卡，成為好兄弟一同成長，共同面對死敵與考驗，展開一段改變命運嘅成王榮耀之旅！

《教宗選戰》教宗突然離世，教廷陷入群龍無首嘅危機，羅馬教廷樞機團長肩負召開教宗選舉嘅重大責任，主持選出新一任教宗嘅閉門會議。世界各地教宗候選人紛紛趕到梵蒂岡，為權力，為榮耀，展開一場爾虞我詐嘅教宗名銜爭奪戰。

《這裡是吾家》描繪住一個世紀裡面同一間屋發生嘅所有故事。主演Richard同佢年少時期嘅愛人，最終成為咗共度餘生嘅夫妻，電影以固定視角拍攝，帶領觀眾走進一個美國家庭嘅客廳裡面，陪佢哋度過一整個世紀悲喜交集嘅生活日常。

《久別重逢》那年盛夏，少女夏文萱同少年蘇昇華，因一張唱片遇上大家。年輕嘅佢哋最想知道，呢份青澀嘅愛情能夠行得幾遠⋯轉眼數十年。已成音樂人嘅蘇昇華（鄭伊健 飾）陷入人生低谷，逃避一切，竟然喺醫院偶遇重逢舊愛夏文萱（蔡思韵飾）。文宣心痛眼前人變化如此，可惜佢被病魔所困，已經係人生終章。

《誤判》 根據真實案件改編，青年馬家杰喺一無所知嘅情況下被指販賣毒品，其辯護律師表面正義，實際誤導馬家杰認罪以換取真兇無罪釋放。檢察官霍子豪發現當中端倪，毅然以一己之力暗中調查，奈何愈揭愈深，發現背後竟牽涉一個龐大嘅犯罪團體。

今個星期票房龍虎榜，截至12月18日中午，第三位《魔海奇緣2》、第二位《爸爸》、第一位《破．地獄》。