吳宗憲《綜藝玩很大》獲人氣節目獎 庾澄慶相隔23年再奪金鐘獎

第59屆台灣電視金鐘獎節目類頒獎典禮圓滿落幕，吳宗憲 坤達 KID 主持嘅節目《綜藝玩很大》，第二度獲得「最具人氣綜藝節目獎」，憲哥話節目係為觀眾而生；坤達話呢個係觀眾票選獎，所以要多謝投票嘅觀眾；而KID就感性多謝節目，陪佢由一無所有一路行到而家有美滿嘅家庭，三人仲承諾觀眾一定會繼續努力回報大家嘅支持。

《綜藝玩很大》再次奪得最具人氣綜藝節目獎
競爭激烈堪稱死亡之組嘅綜藝節目主持人獎，由《超級夜總會》嘅三位主持 澎恰恰 許效舜 同苗可麗 捧走，佢哋打敗包括吳宗憲、小S徐熙娣、曾國城等強敵，尤其澎恰恰近年跨過欠債等負面新聞，可以重新振作再主持節目，獎項得來實屬不易，所以佢都忍唔住喜極而泣。
爆紅日本女團Avantgardey再次應邀到台灣演出

益智及實境節目主持人獎就由 庾澄慶 同 卜學亮 ，率領節目《騎吧！哈林小隊》其他四位主持班底，包括 柯有倫 彭小刀 張庭瑚 同 周予天 共同獲獎。哈林開心宣布節目已經籌備緊第二季，希望可以去到唔同嘅地方拍攝，阿亮獅子大開口提出想去歐洲，即刻俾哈林制止，場面惹笑。另外值得一提嘅係，今次係哈林相隔23年再次奪得金鐘主持獎。
哈林同拍檔勇奪益智及實境節目主持獎，而節目亦將開拍新一季

至於頒獎禮嘅另一個戰場紅地氈，眾女星狀態大勇，紛紛Deep V上陣令人目不暇給。小S雖然失落綜藝節目主持人獎，不過佢喺紅地氈上嗰件鮮黃色浮誇戰衣，就成功搏得唔少版面啦！

小S同派翠克盛裝現身金鐘獎，可惜未能獲獎