StarTalk一氣呵成版丨陳德森曾一年內經歷5大打擊 分享走出情緒病契機

《十月圍城》呢部電影，曾經為陳德森導演帶嚟好多殊榮，但其實呢套電影同時亦為佢帶嚟漫長嘅抑鬱症，最近陳導演有意幫助更多抑鬱症患者，於是開設網上節目探討抑鬱症問題，呢日陳導就應邀嚟到《StarTalk》，同 王鎮泉傾吓開設頻道嘅起因。

陳德森曾身受抑鬱折磨，決定開設頻道協助有需要朋友
圈中唔少藝人都因為抑鬱症而走上絕路，曾經都係受情緒困擾嘅陳導坦言感到心痛，佢又指患者如果家庭收入唔高，排期到政府醫院治療，係要排好長時間，陳導指自己開拍網上節目嘅原因，除咗係想幫助患者外，亦希望幫助大家去了解「甚麼是抑鬱症」，令大家識得點去同患者相處，同時唔好令對方越陷越深。
佢指自己曾兩度跌入抑鬱深淵

陳導總結患抑鬱症嘅三大原因：感情問題、親友離世、工作壓力，而佢話自己由細到大都緊張工作，所以佢係因為工作問題而導致情緒病。陳導表示自己曾兩度患上抑鬱症，第一次係03年，而第二次則於08年。提到首次患病，陳導指自己於一個月內經歷咗5大打擊：投資者兼好友自殺離世，新片資金斷裂、母親意外昏迷，甦醒後唔認得人、姊姊患淋巴癌，喺多重打擊下陳導指自己完全唔識處理，於是開始逃避；最後因為與許冠文嘅一席話，令佢徹底釋解，放低仇恨亦放過自己。
多得當年許冠文一席話令自己放下而走新天

陳導嘅網上節目入面，除咗會有嘉賓嘅訪談外，仲會請嚟唔同專家：西方醫學、精神科、臨床心理學等，除此之外陳導仲搵嚟唔少另類療法嘅專家同大家分享，當中就包括現時為身心靈治療師嘅徐天佑，陳導表示即使佢嘅節目只係幫到一個人，佢都會視為成功。