周國豐辦音樂會籲關注情緒問題 翁嘉穗分享童年媽媽輕生經歷

音樂人周國豐日前舉行記者會，宣布明年4月將會同Hi-Fi天后黃翠珊開音樂會嘅好消息，呢個音樂會以提升公眾對情緒關注做主題。

周國豐宣佈明年4月舉辦音樂會，以關注情緒問題為主題
記者會亦邀請到翁嘉穗分享喺童年經歷媽媽輕生，及患產後抑鬱嘅經歷，佢話自己有認知嘅時候，其實媽咪已經有情緒病，之後仲越嚟越嚴重，翁嘉穗指見到媽咪時，覺得對方清醒嘅時間並唔多，又會經常喊同有尋死念頭。翁嘉穗指好多人覺得自己病時，都會因為恐懼而唔敢講，佢指咁樣少咗一個畀別人幫助你嘅機會，所以佢呼籲大家遇到情緒問題時，唔好被恐懼凌駕，要勇於求助。
翁嘉穗分享母親輕生，與及佢產後抑鬱嘅經歷

對於要分享過去嘅傷痛經歷，翁嘉穗指自己都係get over咗先夠膽同大家分享，佢又指因自己接觸較多情緒病個案，所以都想分享畀正患病或者身邊有人患病嘅朋友知，其實呢個病係有辦法去處理。
Virginia指希望病者同身邊人都可以正確處理問題

音樂會將會以talk show形式進行，周國豐將會擔任導演及主持，黃翠珊負責獻唱。周國豐仲預告會走訪關於情緒病嘅真實個案，睇下大家點樣走出情緒病，當中仲會有演藝界嘅朋友，張敬軒亦係口頭上答應會做訪問嘅其中一位。

周國豐邀請Hi-Fi天后黃翠珊合作今次音樂會
黃翠珊就指同翁嘉穗認識，係因為二人嘅小朋友係同學，佢指做媽咪嘅角色亦會面臨好多情緒問題，而周國豐就表示透過唔同人士、特別係演藝畀嘅知名人士，講返自己嘅經歷，出嚟嘅影響會更大。至於講到音樂會嘅歌單，黃翠珊就話因為想同周國豐一齊合唱，所以而家仲揀緊歌呀。

軒公亦會參與訪問其中個案