直播靈接觸｜陳雅倫被已故男藝人靈體跟身多年 羅泳嫻占卜拆解鍾先生輕生原因

由 梁思浩 黃紫恩 黃耀英 主持嘅 TVB Plus 直播節目《直播靈接觸》10月21號再度回歸，而第二集嘉賓就邀請藝人 陳雅倫 分享靈異經歷。呢集最勁爆嘅，就莫過於係陳雅倫自爆被一位已故多年嘅鍾姓男藝人靈體跟住，佢有次去澳門搵神婆占卜燒衣時，更發生驚人一幕。

陳雅倫指一名已身故藝人靈體於自己身邊出現

當時陳雅倫踎低燒衣，期間忽然間神婆笑瞇瞇望住佢，講咗句：「你識我架，我姓鍾。」而嚇人嘅係，佢睇唔見被鬼上身嘅神婆雙眼眼珠。 呢位鍾姓男藝人35年前跳樓身亡，有指佢係因財困而選擇輕生。而喺節目中，塔羅占卜師羅泳嫻就利用塔羅牌占出另一個原因。羅泳嫻解牌時描述牌象指，鍾先生當年被抑鬱情緒所困，所以鬱鬱不得志，寄情消費氹自己開心。但最後都係因為情緒問題未能解決，最後選擇輕生。
佢指於澳門時對方曾「自我介紹」

雖然一直有傳，鍾先生係因財困而走上絕路，不過財政並唔係主因，反之，係抑鬱問題推佢走上絕路。羅泳嫻仲話，鍾先生嘅靈體都喺錄影廠，更唱出陳百強作品《喝采》其中一句歌詞：「為甚要受苦痛的煎熬……」 而喺牌象中，羅泳嫻亦睇出鍾先生對陳雅倫嘅感情就好似哥哥對妹妹一樣，亦令陳雅倫解開多年心結。喺節目後，陳雅倫就話自己呢次會上節目，都係為「義氣」，要支持思浩。而之所以會喺節目上分享靈異經歷，都係因為年紀漸長，可以同靈界朋友和平共處。

靈體藉塔羅牌向Ellen指點姻緣