Eason泉州歌迷無人機匯演歡迎 來年曼谷演出籌備日澳歐等地

同偶像打完波繼續唔同地方巡迴演唱嘅 陳奕迅 ，近日相隔足足9年再次到泉州演出，而驚喜莫過於歌迷準備以800架無人機表演，重演演唱會嘅典元素同片段，令Eason睇到拍爛手掌。

日前抵達福建泉州嘅Eason，接獲酒店窗外有表演嘅通知，完全冇預計到窗外竟然出現800架無人機，顯示演唱會主題「Fear and Dreams」字樣歡迎佢到泉州。之後無人機又排列出太空人裝，舞台上嘅長鼻木偶同紅藍汽球等花樣，令佢睇到目不暇給，仲不停打卡留念。

歌迷安排800架無人機迎接Eason，令佢非常驚喜
Eason對當地歌迷嘅熱情歡迎非常感恩：「真係好有心，我記得我只係嚟過兩次，一次係DUO演唱會，一次係ANOTHER EASON'S LIFE演唱會，9年喇大家冇忘記我，仲咁樣熱烈歡迎，非常非常感謝。嚟睇演唱會已經好足夠，要大家破費，有啲唔好意思，但又真係覺得好正好好睇，好開心。多謝。」

無人機於空中一直變換唔同圖案睇到Eason拍爛手掌

巡演不經不覺已接近兩年時間，Eason指到每一站都希望盡全力演出，帶俾歌迷最好嘅回憶。呢次到泉州演出，佢仲用認識非常有限嘅閩南話同觀眾打招呼，同歌迷分享活在當下時，有歌迷大叫《富士山下》，Eason大笑指：「富士山下，係講當下咩？富士當下？哈哈！」然後就清唱《富士山下》，而全場竟然齊齊大合唱。

明年2月佢將到曼谷舉行演出，亦正籌備其他城市場次
明年2月Eason將再次打破香港歌手紀錄，會到曼谷Impact Arena呢個萬人體育館演出，門票11月23號起發售。對又一次創新紀錄，Eason就話上一次喺曼谷開唱已係12年前，當時唔係唱咁大嘅場地，所以呢次都係一個新嘗試，非常期待。」

亦有唔少歌迷留言，希望Eason可到更多海外地方開騷，仲許願曼谷站會係廣東話香港原版演出 ，Eason就指見到留言：「許下願先啦，嘻嘻，或者我唱個泰文版呢？哈哈。」而據知日本、澳洲、歐洲等地嘅演唱亦已籌備中，Eason話：「明年再講啦，一切等安排，盡量可以去到唱的地方，我都想去見下大家。」