竇靖童出道8年辦首次個人演唱會 上海開唱型格風範似足媽咪

日前先同 謝霆鋒 同場現身上海一個時裝活動嘅 竇靖童 星期五晚喺當地舉行首次個人演唱會「狀況外」，出道8年嘅童童果然有足媽咪 王菲 嘅優良遺傳，打扮同演出都甚有典範，獨樹一格。

竇靖童舉行出道8年嘅第一個個人巡迴演唱會

演唱會分為五個章節，童童以一貫慵懶空靈聲線，以唔同實驗性音樂風格，將電子、輕爵士、迷幻搖滾、民謠等多種元素融合。 童童以一首《早上好》作序曲，以日出背景設計搭配佢空靈嗓音展開演出，之後分別獻唱《My Days》、《The Way》 等歌曲。之後佢喺台上同觀眾打招呼話：「謝謝大家這個星期六晚上來看這個演唱會，8年啦，終於見面，有一些算是老朋友，有一些新朋友，謝謝大家，一起來一場狀況外演出，好不好？」

呢日佢以多個唔同打扮，演出自己唔同風格嘅歌曲
呢晚童童先後以3個唔同造形亮相，各有不同特色，又於台上大玩唔同樂器，好似Theremini、中國鼓同結他，佢彈結他時仲笑言：「為了這個演出，導演非要我整點活，才藝表現，在樂手老師面前班門弄斧了。」引得觀眾哈哈大笑。
型格又創新嘅演出，盡得媽咪王菲真傳

出道以來一直以創作英文歌曲為主嘅佢，近年亦開始唱作國語作品，演唱會之中就獻唱唔少最新專輯中嘅歌曲，到表演臨完結時，佢仲要求同全場觀眾合照：「有一個小小請求，這是我出道以來第一次巡演，第一場，想跟大家合一個影，可以嗎？」完結今場演出之後，竇靖童亦將會到武漢、北京等地開唱。

完成上海站後，之後將再往武漢同北京演唱