周秀娜拍賀歲片首日即入院縫五針 梁詠琪開工不忘檢查阿女功課

古天樂 梁詠琪 胡子彤 張文傑 伍允龍 周秀娜 王丹妮 等，呢日齊齊出席賀歲片拜神儀式。相隔10年再次同古仔合作嘅Gigi，話最大轉變就係自己已經做咗媽咪，個女仲已經10歲添。

古天樂喺賀歲新片扮演一名退役拳手
呢次喺戲中古仔飾演一位退休拳王，話明係退休，所以古仔話都唔需要接受咩特訓，反而娜姐呢次就打得好甘。而首日開工，佢就被鐵凳整親腳，仲搞到要入院鏠咗五針，扮演小三嘅佢，戲中仲係一名戀愛腦，凡事都係愛情至上。
周秀娜一開工就不慎受傷，搞到美腿要縫針

不過娜姐就話現實中嘅自己性格同角色啱啱相反：「你睇我單身就知我唔係啦，你睇我咁事業型就知我唔係啦，就知我係佛系啦」。呢日Gigi嘅囡囡同埋老公都有嚟到現場，但就唔係嚟探Gigi班，而係嚟揾佢幫手檢查功課，阿媽果然唔易做呀。
呢日Gigi老公帶埋乖女到場，但係並非探班，而係要媽咪睇功課

講到最近又有網民考古咗古仔條《像我這一種男人》扯爛裇衫片段，古仔就幽默回應，話自己經常喺屋企撕爛裇衫，無嘢做就撕下，仲話如果大家想佢重演呢一幕，佢可以考慮加插喺戲中，不過，就會著樽領打定底喎。
《城寨》型男可惜未能Full Team上陣

同場嘅張文傑呢日頭戴綠帽，不過佢就唔介意，仲話無咩好棹忌，雖然呢次喺戲中，無咗林峯同埋劉俊謙兩位好兄弟，但係張文傑就提議兩位可以嚟探班兼萬歲喎。除咗拍戲之外，胡子彤又多咗個歌手身份，對於古仔大讚佢係一個好歌手，唱得好好，子彤就話好開心，至於有無信心年尾爭獎？佢就話唔會諗咁多啦。而首次拍賀歲片嘅陳楨怡，心情都相當期待，佢仲話準備充足，就算上演打戲都無問題呀。