吳若希工作忙難得享親子樂 陳柏宇大女狂騷軟骨功超活潑

吳若希 近排忙住拍劇同埋喺內地開騷，呢日難得見佢返港現身活動，同細仔何少弘一齊參加親子活動，同場仲有 陳柏宇 帶埋六歲大女 陳羿辰 ，加埋 江若琳 抱住歲半大囝囝 蕭立鈞 (Owen) 參加。

吳若希帶埋細囝參加親子活動
三位星級爸媽都有為自己嘅小朋友喺遊戲中加入佢哋最愛嘅元素，Jinny知道囝囝最愛車，所以喺遊戲中加入「鬥車仔」環節令囝囝玩得更投入。雖然囝囝愛玩車車﹐但係三歲嘅佢尚未脫離暈車浪體質，所以Jinny坦言少帶兒子去享受親子遊車河。
幾位星級父母同子女一齊參與活動

江若琳（Elanne）嘅兒子Owen面對現場咁多小朋友同記者唔多習慣，活動上多次爆喊，Jinny嘅囝囝仲有幫忙氹返好有大哥哥風範，而Elanne坦言兒子比較細膽，特別喺遊戲中加入沙元素，希望引起囝囝興趣。而喺眾多小朋友中今年入讀小學嘅Abigail天不怕地不怕，不停展示自己柔軟嘅筋骨，一時玩一字馬，一時玩拱橋，Jason都對囡囡嘅好動表現習以為常。
Abigail嘅筋骨柔軟度唔通嚇親Daddy？

回復自由身嘅Elanne八月時出新歌回歸樂壇，最近佢喺社交平台貼相分享再入錄音室錄歌，Elanne透露十一月會再出今年第二首新歌，以人生為主題，咁啱身旁嘅Jason推出嘅新碟大講人生哲學，兩人新作理念相通，所以Jason歡迎同Elanne音樂上有合作。

早前重返樂壇嘅Elanne，指今個月就會再推出新歌