吳業坤被封演唱會騷肌擔當 胡鴻鈞自揭令坤嫂呷醋事件

同樣係參加《超級巨聲》出身嘅吳業坤與胡鴻鈞Hubert，兩人相識超過14年，呢兩兄弟終於首度合體喺12月開騷，兩人呢日出席演唱會記招時獲大批fans支持，坤哥仲等唔切要除外套展示一下自己操肌嘅成果，難怪Hubert話將演唱會嘅騷肌擔當交畀坤哥啦！

參加《超級巨星》一齊入行嘅吳業坤同胡鴻鈞12月將合作開騷
Hubert話知道坤哥一直有紀錄自己呢段時間操肌嘅點滴，所以佢都好期待對方喺演唱會展現成果，而坤哥就笑言佢哋個演唱會有一句口號「掛胡鴻鈞頭，賣吳業坤身」呀。
呢對老友真係Friend到不得了

呢輪Hubert都喺社交平台收集fans意見，為個騷設計歌單，但就估唔到會勾出坤哥嘅黑歷史，早年坤哥喺吳若希嘅演唱會上獻唱《必殺技》，但就因為練習不足加緊張，所以唔小心破咗音，坤哥話呢件事足足畀Hubert笑咗兩年，不過Hubert就話自己早已經忘記咗呢件事，係歌迷點歌時重提佢先記起呀。
但係就原來曾經搞到坤嫂呷醋喎

記者會上Hubert細心為坤哥拎走頭髮上嘅細碎，呢兩兄弟嘅親蜜互動，就連坤嫂濱口愛子都一度呷醋呀！Hubert仲分享當日喺坤哥婚禮上，因為自己一個動作而令坤嫂打翻醋埕嘅事件。由於記者會當日係坤嫂嘅生日，所以坤哥就透過訪問同太太祝賀，而在旁嘅Hubert亦即時向坤哥學以日文向對方講生日快樂。