黃淑儀推食譜新書陳松伶返港支持 哎呀囝囝錢嘉樂專程度期撐場

黃淑儀 推出第15本食譜新書呢日去到商場宣傳，Gigi即場傳授廚藝，教用佢秘製嘅醬汁炒飯，食到街坊們同來賓大讚好味。Gigi姐獲老公到場支持之外，亦有唔少後輩專程撐場，包括譚玉瑛、錢嘉樂、著名時裝設計師鄧達智等，而長居北京嘅陳松伶仲同內地演員老公張鐸專程來港支持，令Gigi姐相當開心。

陳松伶同老公張鐸特地返港支持Gigi姐
松松姐姐透露Gigi姐係佢嘅廚藝老師，有咩煮食問題佢都會即時「打電話問功課」，依家成功收伏老公嘅胃，老公對佢嘅靚湯同蒸魚等廣東菜甚為欣賞。
松松仲話跟Gigi姐學藝令老公非常滿意

錢嘉樂喺多部劇集中有幸同Gigi姐演兩母子，Gigi姐亦喺現場大爆潘嘉德監製為何有咁嘅安排，全因Gigi姐夠氣場「食住」嘉樂。而嘉樂反而因為結識咗Gigi姐呢位哎呀媽咪而大飽口福，Gigi姐經常親自下廚喺家中宴客，嘉樂亦大爆因為Gigi姐不時搬靚屋，所以佢走勻香港各區。因為四圍住所以Gigi姐亦熟識各區街市行情，曾推介譚玉瑛去邊度買麵粉整饅頭。
家樂因為拍劇多次同Gigi姐扮演母子而成為好友

Gigi姐見到有咁多老友支持自己亦相當開心，更多謝錢嘉樂呢位哎呀囝囝度期黎現場，突顯佢地戲外嘅深厚母子情。Gigi姐透露不停推出新食譜，但宗旨不變，食譜中嘅材料和烹調方法迎合香港、北美等各地嘅煮婦，以實用行先。