周潤發笑指手腳腫塊因自虐而成 親揭為何沒有開立社交帳號

一個國際知名品牌喺香港舉行兩場「2024/25春夏時裝騷」，邀請世界各地名人明星參與，夜晚場嘅嘉賓雲集巨星，當中最矚目嘅當然係邀請名單以外，以神秘嘉賓身份出現嘅發哥喇，發哥拖實太太現身，仲自言一身打份似足教授，又笑言係跑步教授。佢透露月中將到機場三跑參加10公里賽，明年初再出戰香港馬拉松嘅半馬賽事，佢話跑半馬已經係極限，若挑戰全馬會死得。

周潤發呢日自言係一身教授打扮出席品牌活動
發哥早前跑步時被發現手臂同腳部，有凸起疑似腫塊，令大家非常擔心，發哥就幽默話隻腳腫起就搵鎚仔揼，好似乒乓波咁大仲可以接受，若果大到好似網球咁就要入醫院，如果變到菠蘿咁大就要去急症室喇，大笑過後，發哥就解釋其實所謂腫脹都只係皮下脂肪。
佢時隔多年再同G Dragon見面

自從上次喺MAMA頒獎畀BIGBANG後，相隔咗8年左右再同G-Dragon權志龍碰面，佢仲提議兩個人影合照睇吓彼此有冇後生咗，當傳媒叫發哥記得喺網上分享時，佢就話自己冇社交帳號，因為唔想畀人知道行蹤。親民嘅發哥，仲喺訪問尾聲同傳媒嚟張招牌自拍照，期間仲妙語如珠。
發哥話要用兩張相比較同GD幾年來有咩變化咁話

時裝騷上同樣矚目嘅仲有K-Pop天王G-Dragon現身，佢仲應傳媒要求大派心心。而西班牙女星Penelope Cruz以品牌大使身份亮相，另外受邀出席嘅嘉賓就有劉嘉玲、陳法拉、馮德倫、琦琦、鍾雪瑩、談善言、陳漢娜、蔡思韵、韋羅莎、湯令山同陳蕾等。

西班牙女星Penelope Cruz以品牌大使身份出席

陳法拉呢日亦有參與活動