偕唐詩詠出戰機場三跑馬拉松 獨家直擊周潤發賽前賽後心情

赤臘角機場嘅第三跑道完工，星期日舉行「三跑道系統十公里國際賽」順利完成，整個賽事有超過1萬人參與，其中亦唔少得熱愛跑步嘅影帝周潤發，呢次發哥仲拉埋 唐詩詠 一齊跑。ENews就獨家現場直擊佢哋嘅賽前表現，發哥同詩詠仲接受我哋獨家訪問。

發哥同詩詠信心十足，因為此行享受於跑道風光多於成績呀
近年唔跑唔安樂嘅發哥話，賽前有向詩詠傳授跑步心得，叫佢唔駛咁勁，以嬉戲心態迎戰就得。發哥又話自己食飽自製烚蛋做早餐，而詩詠就食咗個齋通粉。能量滿滿嘅發哥，仲話就算跑步期間有好多人揾佢打卡，佢都無任歡迎，親民指數真係爆晒燈呀！
發哥一如既往跟住自己頻率落力跑

之後發哥同詩詠就一齊起跑，發哥神態自若，步姿優美。最終以1小時17分10秒完成賽事，發哥一跑完，唔少在場嘅朋友都報以熱烈歡呼。發哥亦好nice走向參賽者，同佢哋逐一自拍兼簽名，可以同發哥近距離互動，大家都笑逐顏開！
最後以約1小時17分完賽

主播 泉叔 亦第一時間捉住發哥，問下佢跑完嘅感受。發哥話好滿意自己嘅成績，亦都好享受整個過程，因為可以邊跑邊欣賞飛機升降好過癮。至於下次會唔會挑戰全馬，發哥就話未係時候喇！經常四周圍練跑嘅發哥仲自爆行蹤，話唔定大家喺青山公路、山頂等地方可能會撞到佢！發哥最後仲讚下詩詠呢個徒弟仔，之前練跑時氣比較弱，但越跑越好！
賽後亦一直同各界跑友自拍

而詩詠亦都表現唔錯，佢都話幾滿意自己表現。希望自己練好10公里，再有機會挑戰半馬同全馬。詩詠話比賽去到5到6公里時，都仲見到發哥身影，但之後已經跟唔上佢步伐，其實呢排詩詠除咗要忙於練跑之外，佢亦要打理啱啱開業嘅麵包店，所以佢都話真係好忙，作為老闆娘嘅佢，當然要親力親為，所以佢話有時都會落舖幫手，同客人互動吓。

佢仲話香港周圍都可以隨時遇見佢，打卡無任歡迎呀