陳豪爆陳茵媺每晚為子女抄筆記 陳芊芸感謝網民為女團命名181

陳豪同《中聲2》嘅顏米羔、陳芊芸（前名 陳蒨葶）呢日齊齊現身一個公屋社區裝飾比賽頒獎禮，雖然阿Mo並非基層家庭中成長，但細個讀書時學校都好貼近屋邨，佢話到而家都好記得嗰種獨有嘅情懷，佢仲同大家分享記憶中喺屋邨過中秋嘅難忘美景。

陳豪指今年聖誕會為子女溫習，所以未有打算出門
過往嘅聖誕假期，阿Mo都會同老婆帶埋小朋友一齊出遊，不過今年佢哋就決定留港消費，為小朋友嘅學業做好準備，阿Mo仲話因為自己比較忙，幸好有老婆陳茵媺坐鎮照顧三個小朋友，佢又話Aimee每晚都會等小朋友瞓咗後，拎佢哋嘅書出嚟抄低啲Notes，自己學識晒再幫小朋友去溫習。
陳豪同茵溦真係廿四孝父母

顏米羔最近忙於搞fans club成立一周年，以及為開騷落力綵排，而身邊嘅芊芸近日就同戰友陳俞霏、王玥、林思彤（前名 林若盈）、陳譽文（前名 陳燕娜）組成五人女團MISSY，佢哋都各自即將開騷，問到會唔會互做嘉賓？顏米羔即刻講笑話請唔起MISSY，仲隨即擺出對方組合嘅相應手勢，而芊芸則自嘲佢哋嘅女團叫181，起因係網民將佢哋五人嘅歲數加埋一齊，芊芸話好多謝大家為佢哋改呢個名，仲話周國豐而家都叫佢哋做MY181。

顏米羔同陳芊芸為演出各有各忙