聖誕佳節丨陳法拉帶仔女享受假期曬回眸甜笑 陳凱琳獲三子輪流狂啜一臉幸福

每年歡度佳節，就係要一家人開開心心圍埋相聚，有小朋友嘅屋企更係儀式感滿滿，散發濃濃嘅節日氣氛，好似鄭嘉穎同太太陳凱琳（Grace）、陳豪同愛妻陳茵媺、陳法拉同老公Emmanuel等分別喺網上分享幸福家庭照，隔住個mon都感受到聖誕節嘅歡樂與溫暖。

嘉穎孖老婆Grace、大仔Rafael、次子Yannick及孻仔Carlos一齊歡度佳節。
嘉穎孖老婆Grace、大仔Rafael、次子Yannick及孻仔Carlos，跟外父外母一齊慶祝聖誕節，Grace喺社交平台曬出多張合照並寫道：「簡單單過聖誕🎄🥰🤣 With the best people ❤️」
席上仲有好友黃智賢（Ben），皆因嘉穎同阿Ben相識廿幾年，阿Ben更係嘉穎寶貝仔嘅契爺，過時過節又點少得阿Ben，見佢哋影合照時，阿Ben開心抱起Rafael，而Rafael亦笑晒雙手舉V字手勢，三個阿仔相當可愛，輪流狂錫媽咪，哄得Grace一臉幸福，笑到見牙唔見眼。

Grace爸爸有孫萬事足，開心陪睇電視。
而陳豪同茵媺就一早準備咗一堆聖誕禮物，等3個仔女喺聖誕節第一時間拆禮物，見小朋友興奮撕走包裝紙，阿女Camilla更對細小嘅玩具充滿好奇，拎上手係咁睇，應該對茵媺準備嘅禮物幾滿意。茵媺除咗喺社交平台上載一家五口全家福，更指今年聖誕願望係Boxing Day呢日能夠瞓懶覺。

陳豪同茵媺就一早準備咗一堆聖誕禮物，等3個仔女喺聖誕節第一時間拆禮物。
陳法拉今年聖誕帶住大女小米妮、同埋今年3月出世嘅阿仔「小米奇」一齊享受假期，佢喺IG貼出靚相，並留言：「Wish you all a joyful and peaceful holiday! ❄️」相中見法拉推住BB車，又拖實大女，一臉幸福咁回眸一笑，相信呢張相係由佢嘅法籍老公Emmanuel「操刀」，而5歲大女對周圍環境好好奇，不時四圍睇吓，好有好奇心！

陳法拉今年聖誕帶住大女小米妮、同埋今年3月出世嘅阿仔「小米奇」一齊享受假期。