鄭丹瑞新戲搵大女鄭瑤客串 廖子妤同旦哥拍嗌交戲過足癮

由鄭丹瑞、廖子妤、盧慧敏、馮允謙以及袁富華演出嘅新戲《得寵先生》呢日喺香港亞洲電影節舉行首映，今次套電影以旦哥飾演嘅頑固爸爸為中心，連旦哥啱啱結婚嘅大女鄭瑤都有份客串，「因為我想呢件事好有趣地，到我第時百年歸老，但係呢啲戲可以俾佢嘅下一代，你睇下公公，可以一路傳落去，我覺得好得意。」
鄭丹瑞主演嘅電影呢日喺香港亞洲電影節舉行首映。
而鄭瑤就話，之所以會應承爸爸客串，最大原因係嗰場戲好簡單，而整個拍攝過程都好好玩，同戲中飾演旦哥囡囡嘅Fish亦都好好傾。

Fish喺戲中同飾演佢爸爸嘅旦哥有唔少衝突戲份，仲要大大聲鬧交，Fish就話拍得好爽，「我嘅人生入邊係冇乜機會同阿爸嗌交，可以將我想表達嘅情感喺戲內戲外，真真假假咁將情感抌晒出去比旦哥接招。」
Fish喺戲中同飾演佢爸爸嘅旦哥有唔少衝突戲份。
至於拍攝經驗尚淺嘅ANSONBEAN同Jay就話，好多謝戲中幾位前輩包容，而同Jay飾演情侶嘅Amy，為咗拉近二人之間嘅距離，主動同對方傾音樂，果然成功打破隔膜，順利演出。