焚城｜環保專家劉德華神秘現身謝票 新片票房破2千萬約定周三再現戲院

破天荒以香港遭受大型災難為主題，集合 劉德華 白宇 莫文蔚 謝君豪 王菀之 王丹妮 廖子妤 何啟華 魏浚笙 同 梁仲恆等卡士演出嘅《焚城》，上映截止星期日為止，票房已衝破2千萬。戲中飾演環保專家嘅劉德華，仲驚喜現身同眾演員一齊參與謝票，佢仲即場答應星期三將再次加入謝票行列。

劉德華星期日突發現身戲票，唔止觀眾、連演員都唔知情

啱啱完成演唱會演出返港嘅華仔，星期日神秘現身戲院，同《焚城》團隊合體，由於一直保密，連演員都對華仔出現毫不知情，直到佢喺觀眾席舉手發問，大家先發現華仔嘅身影，令大家都驚喜萬分。 華仔之後到台前同戲中隊友擁抱打招呼，王敏德仲以角色上問跟華仔：「Are you losing your mind?」而反應極快嘅華仔就以戲中對白回應：「你玩完啦！」。 

華仔亦大讚一眾新生代演員努力又認真

華仔又感謝觀眾支持幾位新演員，雖然佢戲中同一班年輕演員合作場口有限，不過就指一直留意呢班扮演消防嘅新生代演員，由開始練習到拍攝時嘅過程同經歷，仲大讚佢哋係影壇嘅未來。 

周文健同王敏德兩位Michael都有演出新片

年輕演員都話有機會同華仔合作非常興奮，其中阿炳就覺得對方隨和又Nice，仲會講笑話同問大家IQ題，紓緩工作緊張氣氛。不過身邊嘅Michael(王敏德)就搞笑插嘴：「我覺得唔係好Nice嘅，成日鬧我(片中為華仔死對頭)，不過佢話下次有機會搵我同Michael(周文健)一齊拍喜劇，仲可以英文對白，OK啦！」 而Locker雖然只同華仔得數面之緣，但現場聽到華仔指會邀請兩位Michael拍喜劇時，就即醒目自薦，而華仔亦表示無任歡迎，仲透露知道Locker受腳傷仍繼續開工，大讚敬業。至於Wesley就慶幸一場與華仔合作着防火袍入火場戲份，又爆華仔多次陪伴大家拍到最後。