鄭秀文貪靚落街買餸都要化行妝 再提與劉德華CP再現仍心花怒放

鄭秀文(Sammi)出席美妝活動分享平日扮靚嘅日常，品牌搵嚟Sammi做嘉賓真係再適合不過，因為好多女藝人唔使工作時，都會素顏出街，但Sammi就啱啱相反，仲話每日一起身洗完面之後，第一時間就會化妝返個靚先，即使落街買餸都會畫晒眼線，而且真心好鍾意化妝過程，對佢嚟講係一種樂趣。

Sammi話自己好貪靚。
劉德華日前喺八號風球前夕現身戲院謝票，Sammi特登去到撐場，令所有人都好驚喜。重提呢件事時，Sammi仍然好興奮表示會撐華仔一世，大家在心中，事實上同華仔已經好耐冇見，自己都好開心，希望可以帶到驚喜俾華仔，同埋支持電影，Sammi話眼見華仔又要巡演又要拍戲又要宣傳，真係唔容易，畢竟都唔係二十歲，所以一定要支持同埋為一班新演員打氣。華仔同Sammi呢對經典CP合體後，網民期待住佢哋再合作，Sammi都希望有呢一日，但首要係有個好劇本或計劃，唔想為合作而合作失去意義。
Sammi之前去撐華仔場。
Sammi日前喺社交平台Post咗張輪椅，仲搞笑話係媽咪嘅私人法拉利，儘管媽咪要靠輪椅代步，Sammi解釋之前媽咪行唔到，要用輪椅代步，但佢心態好正面接受，完全冇灰心，仲好用心粉飾輪椅。