鄭秀文驚現劉德華新片謝票現身 買牛雜歸家與老公許志安撐枱腳

鄭秀文同劉德華呢對最佳螢幕情侶出名感情好，最近華仔有份演出嘅新片上身，Sammi當然要入場支持啦！日前佢除咗自費買飛入場撐華仔部新戲，之後仲趁對方出席謝票活動時，專登去咗撐場，呢個big surprise真係令華仔同班戲迷好興奮！事後Sammi仲喺社交平台再為華仔同電影團隊打氣，叫大家入場支持港產片外，又祝嚟緊將會再舉行演唱會嘅華仔身體健康。
Sammi 驚喜現身戲院謝票。Sammi同華仔好耐冇合體現身喇！唔少網民羨慕呢場嘅觀眾。
而撐完華仔場後，Sammi就去咗街坊店買牛雜同牛腩返屋企，同老公許志安一齊撐枱腳，見Sammi食得津津有味，仲同安仔講：「呢個都好食呀，都入味。」而同枱嘅安仔亦都回應：「好食呀﹗」，仲問Sammi有無比埋辣椒醬? 睇嚟兩口子對今餐嘅牛腩宵夜好滿意噃。
  謝票後Sammi買宵夜同老公許志安一齊食。
Sammi不時會喺社交平台分享工作點滴同生活軼事，近排佢都有談及年邁母親嘅身體狀況，一向非常孝順嘅Sammi，日前除咗同家人去咗拜亡父之外，亦有去探望媽媽，佢透露媽媽身體狀況尚未康復，所以未有同行去拜祭，之後更po出媽媽嘅輪輢，佢幽默寫道：「老媽子的『私人法拉利』，幽默面對人生的每個處況，MI好鍾意媽咪放上這個獅子頭咕臣。So cute 呵呵！」
同家人去咗拜祭爸爸。Sammi透露媽媽身體狀況。