劉德華謝票獲Sammi驚喜撐場 坦言香港個唱暫無意加場

劉德華為新戲謝票，獲鄭秀文驚喜現身撐場，兩人激罕同框，令現場戲迷相當興奮，Sammi更向華仔展示自己真金百銀買嘅戲票，仲除咗大讚電影團隊拍咗一部非常精彩嘅作品之外，更話對華仔嘅演出好滿意。至於有無同Sammi再合作嘅計劃？華仔就話都暫時未有，但其實好想，所以睇下嚟緊有咩新導演，可以提議有咩角色適合揾佢哋拍。
鄭秀文驚喜現身劉德華新片謝票。
喺戲中飾演華仔囡囡嘅許恩怡，當然令唔少人羨慕啦，有小粉絲仲即場大叫華仔做劉爸爸，搞到華仔都有啲受寵若驚呀。而一眾新晉演員喺戲中表現亦十分亮眼，獲華仔及Sammi大讚，佢哋都希望票房可以繼續攀升。
許恩怡喺戲中飾演劉德華個女。
華仔12月將會喺香港舉行聖誕及跨年演唱會，所以佢都話好快要閉關準備，之不過，華仔喺內地巡演時險象環生，令粉絲都好擔心，華仔就話有時表演時太忘形，有時會掉以輕心咗。至於問到佢有無打算加場？華仔就話無時間可以加場，除非真係唔休息或唱中午場，但佢話一貫以嚟，20場就係20場，好少會再加。