星光路上丨楊茜堯新劇演活復仇女王 由丫鬟妓女煉成視后之路

台慶劇《黑色月光》正在熱播中，相隔六年再返娘家TVB拍劇嘅視后楊茜堯，因為演活復仇女王Moon姐一角，成為今屆《萬千星輝頒獎典禮》嘅視后大熱，茜堯作客《星光路上》接受主持 潘盈慧 專訪，就有分享自己對獎項嘅睇法。
楊茜堯接受《星光路上》訪問。茜堯嘅演藝路由TVB訓練班開始。
茜堯嘅演藝路由TVB訓練班開始，佢話當年報讀訓練班人數多達七千人，競爭好激烈，至於自己點解揀咗TVB，原來背後原因好搞笑，「爸爸當時好鍾意隔離台，我好想同佢打對台，因為佢唔俾我睇TVB，所以我咪應徵TVB囉！」
茜堯曾演過唔少角色。喺劇中仲試過畀人浸豬籠。
茜堯訓練班畢業後做過好多角色，包括尼姑、丫鬟、妓女，甚至俾人浸過豬籠，不過茜堯嘅努力亦為佢贏得獎項，由飛躍進步、女配角，再到女主角，茜堯自封得獎「大滿貫」，好開心每一個階段都有獎項肯定。
茜堯話而家睇返之前嘅演出，覺得相當浮誇。
而講到演藝路上嘅重要轉型，一定就係《宮心計》嘅姚金鈴，事關呢個角色係茜堯第一次挑戰奸角，而且仲係佢自己爭取演出㗎，為咗演好個奸樣，茜堯日日喺屋企對住塊鏡練習奸笑，不過依家再睇返轉頭，佢就覺得自己當時嘅演出太浮誇啦！
有唔少觀眾大讚茜堯單憑一個眼神就足以攞視后。
講到熱播台慶劇《黑色月光》，有唔少觀眾大讚茜堯光憑一個眼神就足以攞視后，茜堯話好多謝大家嘅肯定，不過自己對獎項唔會強求，最重要做好本分，結果如何就交俾個天決定。